Korporata KESCO ka njoftuar se dje ka dorëzuar propozimin në ZRRE që vendimi për hyrjen në fuqi të tarifave të reja për çmimin e energjisë të mos zbatohet nga data 9 shkurt 2022, por të nisë së zbatuari në ciklin e ardhshëm të faturimit, përcjell InLajmi.
Kjo, sipas KESCO për shkak se ky propozim ka ardhur si rezultat i vështirësive që të bëhet prerja e gjendjes së leximit në një ditë për të gjithë konsumatorët në Republikën e Kosovës.
“Ne synojmë që me këtë propozim të shmangim kofuzitetin e konsumatorëve në faturimin e këtij muaji duke zbatuar në të njëjtën faturë tarifat e deritanishme me tarifat e reja. Nëse ZRRE-ja do ta marrë për bazë këtë propozim, atëherë faturimi i tanishëm do të zbatohet me tarifat e vjetra për të gjithë konsumatorët.Pavarësisht kërkesës se lartë për energji elektrike në këtë muaj dimri, KESCO është e angazhuar të mbartë kostot përkatëse, si lehtësim për konsumatorin”,thuhet në njoftim.
Tutje, në njoftim thuhet se, të njëjtën kohë, KESCO do të fillojë një fushatë masive për të këshilluar konsumatorët që si të përdorin pajisjet e tyre më së miri në mënyrë që ta përballojnë sa më lehtë periudhën e faturimit me tarifa të reja.
Ndryshe, ZRRE ditë më parë ka miratuar tarifat e reja të energjisë elektrike për të gjithë ata që harxhojnë më shumë se 800 kilovatë. /InLajmi/
