Skitarja Kiana Kryeziu, është gati për të debutuar në Lojërat Olimpike Dimërore që po mbahen në Pekin të Kinës.
Kryeziu në një intervistë të dhënë për Komitetin Olimpik të Kosovës tha se kjo ka qenë një prej synimeve kryesore të saj.
Ajo theksoi se pret që nesër të ketë performancë të mirë.
“Gati jam. Jam e përgatitur gjatë gjithë vitit 2021. Ka qenë një prej synimeve më të mëdha të mia. Jam shumë e emocionuar dhe mezi po pres”.
“Pritjet e mia janë që të kem një performancë sa më të mirë për shkak që për ata që i dinë nuancat e sportit e dinë se sa është e vështirë që të kualifikohesh për të arritur këtu. Siç e dini vetëm 100 shtete nga 200 janë kualifikuar. Nëse nuk gabohem ndër 100 shtete, kështu që ardhja këtu ka qenë një sukses shumë i madh”.
Erërat e forta nuk lejuan që sot të zhvillohej gara e parë, aty ku do të merrte pjesë edhe skitari Albin Tahiri.
Gara e parë për Kianën fillon në orën 2:30 sipas kohës tonë lokale, njofton Komiteti Olimpik i Kosovës.
Ndërkaq gara e 2-të pritet të nis nga ora 07:30, përcjell Klan Kosova.
E skitari Albin Tahiri, do ta zhvillojë garën e tij në lëshim prej orës 05:00 të mëngjesit sipas kohës tonë lokale.
