Drejtori i Shëndetësisë në Prishtinë që është edhe infektolog me profesion, Izet Sadiku, thotë se vaksina nuk ofron mbrojtje 100% kundër koronavirusit.
Sadiku në RTV Dukagjini megjithatë thotë se vaksina është mbrojtja më e mirë kundër koronavirusit dhe formave të rënda të sëmundjes.
“Tash kemi rreth 30 mijë raste aktive dhe vetëm rreth 100 persona janë të hospitalizuar. Vitin e kaluar ndoshta kemi pasur shumë më pak raste aktive por kemi pas mbingarkesë në spitale”, deklaroi Sadiku.
Sadiku ka treguar edhe një rast personal për efektin e dozës së 3-të të vaksinës.
“Javën e kaluar kemi pasur 2 fëmijët pozitiv me koronavirus. Bashkë me bashkëshorten e kemi ditur që ata janë pozitiv por nuk është se jemi ruajtur nga ta. Për shkak se kemi pasur edhe dozën e 3-të të vaksinës ne nuk jemi infektuar. Kjo tregon efektshmërinë e vaksinës”, deklaroi tutje infektologu.
Ai thotë se në Kosovë pak njerëz ka të imunizuar me dozën e 3-të.
“Vetëm ata që kanë marrë dozën e 3-të në dhjetor konsiderohen të imunizuar pasi që ata që janë vaksinuar në janar e këndej ende mund të mos kenë fituar imunitet. Mirëpo edhe ata që marrin dozën e 3-të të vaksinës nuk kanë mbrojtje 100% ndaj Omicronit. Nëse 100 persona marrin dozën e 3-të, gjasat janë që 25 të infektohen, por ata do ta kalojnë shumë lehtë sëmundjen”, deklaroi tutje Sadiku.
