Pas rritjes së rasteve me Covid-19, Kosova ka ashpërsuar masat mbrojtëse. Ndër masat e vendosura është se qytetarët që hyjnë në Kosovë duhet të kenë 3 dozat e vaksinës anti-Covid apo 2 doza dhe testin PCR negativ, jo më të vjetër se 48 orë.
Pas kësaj ka pasur reagime të shumta. Lidhur me këtë është është deklaruar edhe zëvendëskryeministri i parë i Maqedonisë së Veriut, Artan Grubi.
Ai tha se ky vendim i befasoi dhe nuk e kupton arsyen e një mase të tillë, pasi që gjendja me Covid-19 është e njëjtë në të dyja vendet.
“Vendimi i fundit i autoriteteve shëndetësore kosovare na befasoi dhe nuk e kuptoj arsyen për një masë të tillë, sepse situata shëndetësore është e njëjtë si në Kosovë dhe në Maqedoni të Veriut a po edhe në Shqipëri, ndersa OBSH dhe vendet perëndimore po shqyrtojnë largimin e kufizimeve”.
“Shpresoj që Qeveria e Kosovës do ta shqyrtojë këtë vendim gjatë javës që vjen dhe do t’i rikthejë masat paraprake”, thotë ai.
Grubi tregon se synimi i tyre është që të largojnë kufijtë mes 2 vendeve, në mënyrë që të lehtësohet qarkullimi i njerëzve dhe mallrave.
“Një nga vendimet e para në të cilat kemi insistuar që të ndërmirren në qeverinë e kaluar ishte të hiqen kufizimet në kufirin me Kosovën dhe këtë e arritëm pas shumë përpjekjeve dhe takimeve me autoritetet shëndetësore në Kosovë”, tha ai për Indeksonline.
Kjo i ndihmoi qytetarët nga të 2 anët e kufirit dhe ka funksionuar pa asnjë pengesë.
Synimi jonë është që të largojmë kufinjtë midis nesh duke nisur nga menaxhimi i përbashkët i vendkalimeve kufitare që do të lehtëson qarkullimin e njerëzve dhe mallrave”, u shpreh ai.
