Chelsea ka kërkuar informacion në lidhje me mbrojtësin e Milanit, Theo Hernandez, por kuqezinjtë nuk do ta shesin francezin për më pak se 60 milionë euro.
24-vjeçari përfundoi një transferim prej 21 milionë eurosh nga Real Madrid në vitin 2019 dhe konsiderohet si një nga mbrojtësit më të mirë në Evropë.
Ai ka kontratë të vlefshme deri në qershor të vitit 2024, por Milani tashmë është në bisedime me përfaqësuesit e tij për të zgjatur qëndrimin e tij në klub deri në vitin 2026 me një rritje page.
Theo ka qenë i lidhur me shumë klube të mëdha gjatë muajve të fundit, nga Paris Saint-Germain te Manchester City.
Sipas gazetës Tuttosport, gjigantët e Ligue 1 u përpoqën të nënshkruanin me francezin në verë, por tani në garë ka hyrë Chelsea që po konsideron një lëvizje për lojtarin në muajin janar.
Sipas raportit, Blutë i telefonuan Milanit për të marrë vesh disponueshmërinë e francezit, megjithëse nuk ka një negociatë zyrtare në vazhdim, transmeton Telegrafi.
Milani nuk është i gatshëm ta shesë lojtarin dhe vetëm një ofertë mbi 60 milionë euro mund t’i bëjë drejtuesit e klubit të rishqyrtojnë të ardhmen e Theos në klub.
