Franca ka urdhëruar mbylljen e një xhamie në veri të vendit për shkak të natyrës radikale të predikimit të imamit të saj, transmeton InLajmi.
Xhamia në Beauvais, një qytet me 50,000 banorë rreth 100 kilometra (62 milje) në veri të Parisit, do të qëndrojë e mbyllur për 6 muaj.
Këtë iniciativë e mori Ministri i Brendshëm Gerald Darmanin, i cili tha se ai kishte nisur procedurën për mbylljen e xhamisë sepse imami po nxiste urrejtje, dhunë dhe “mbronte xhihadin” në predikimet e tij.
“Kërcënimi terrorist mbetet në një nivel shumë të lartë dhe mbyllja kishte për qëllim që të parandalonte kryerjen e akteve terroriste“, thuhej në dokumentin e mbylljes, shkruan France 24.
Qeveria franceze njoftoi në fillim të këtij viti se do të shtonte kontrollet e vendeve fetare dhe shoqatave të dyshuara për përhapjen e propagandës radikale islamike.
Ministria e Brendshme tha këtë muaj se rreth 100 xhami dhe salla të lutjeve myslimane nga numri i përgjithshëm i Francës prej më shumë se 2,600 janë hetuar gjatë muajve të fundit për shkak të dyshimit se ato po përhapnin ideologji “separatiste”. /InLajmi/
