Qeveria e Iranit duke filluar nga sot mori vendim për të mbyllur kufijtë tokësorë të vendit në një afat prej 15 ditësh në kuadër të masave të ndërmarra kundër variantit Omicron të COVID-19.
Rouhollah Latifi, zëdhënësi i doganave në një deklaratë për Agjencinë e Lajmeve të Punëtorëve Iranianë (ILNA) dha informacione lidhur me masat e reja të marra për shkak të variantit Omicron.
Ai tha se kufijtë tokësorë do të jenë të mbyllura për 15 ditë për kalimin e udhëtarëve por hyrjet dhe daljet tregtare do të vazhdojnë.
“Vendimi është marrë në kuadër të kërkesës nga Bordi Kombëtar për Luftën ndaj Koronës me qëllim për të parandaluar përhapjen e variantit Omicron”, theksoi Latifi i cili shtoi se që nga sot do të jenë të mbyllur kufijtë tokësorë me Turqinë, Irakun, Afganistanin, Azerbajxhanin, Armeninë dhe Pakistanin.
Sipas tij, gjatë kësaj periudhe në pikat kufitare tokësore mund të kryejnë hyrje-dalje ata të cilët kanë leje qëndrimi të përhershme, vizë arsimi, tregtare dhe shëndetësore. Latifi tha se aktivitetet tregtare do të vazhdojnë si më parë, transmeton Anadolu Agency (AA).
Zëdhënësi i doganave nënvizoi se pikat kufitare mes Turkmenistanit dhe Iranit nuk janë hapur për kalimin e udhëtarëve që nga fillimi i pandemisë e deri më sot.
