Ligjëruesi në Universitetin e Agderit në Norvegji, Abit Hoxha ka thënë se ideja e “Ballkanit të Hapur”, parimisht nuk është ide e keqe.
Ai në emisionin “Frontal” në T7, ka thënë se edhe BE-ja dhe shtetet anëtare individualisht po e përkrahin këtë ide.
“Mendoj se ‘Ballkani i Hapur’ në parim nuk është ide e keqe. Mendoj se në parim si ide do të duhej që të përkrahej. Por mendoj ka edhe politika të tjera prapa idesë së ‘Ballkanit të Hapur’. ‘Ballkani i Hapur’ në një farë forme i integron shqiptarët në rajon. Në fakt nëse e shohim sot mbledhjen në Tiranë, komisionari i BE-së për Zgjerim i përkrahu idenë e ‘Ballkanit të Hapur’. Nëse i shohim individualisht shtete anëtare të BE-së ka deklarata pro ‘Ballkanit të Hapur”,ka thënë Hoxha.
Më tutje, Hoxha deklaroi se integrimi paraprak është përparësi për integrimin e shteteve në BE.
“Nëse i shohim politikat e Unionit Evropian në raport me vendet që aspirojnë anëtarësimin në BE, shohim se sa më shumë që ka një integrim paraprak, gjasat janë më të mëdha që të përmbushen ato standardet”, ka thënë ai.
Parimisht, sipas tij ideja e “Ballkanit të Hapur” nuk është ide e keqe.
“Mendoj që alternativa e ‘Ballkanit të Hapur’, nuk mund të jetë e keqe në parim. Por kur implikohen çështjet me nacionalizëm besoj që dalin probleme të tjera”, ka thënë ai.
