Ministri i Punëve të Brendshme, Xhelal Sveçla, ka reaguar pas aksionit të ndërmarrur nga Policia e Kosovës në zonën e Brezovicës, përcjell InLajmi.
Sveçla ka thënë se ashtu siç është zotuar që do ta luftoj krimin në vend në atë mënyrë u zhvillua aksioni në Brezovicë nga Policia e Kosovës, aksioni nuk ka pas ndonjë cak persona apo etni të caktuara, por njëjtë si çdo aksion tjetër i Policisë që ka cak shkelësit e ligjit.
Tutje ai ka shtuar së si Ministri e Punëve të Brendshme në bashkëpunim me Policinë e Kosovës, do të jenë të përkushtuar që të ofrojnë siguri, rend dhe ligj në vend për qytetarët.
Postimi i plotë i tij:
Ashtu siç jemi zotuar se do të luftojmë krimin në çdo cep të vendit, sot u zhvillua suksesshëm aksioni i Policisë së Kosovës ndaj krimeve me ndërtime që kanë shkatërruar një pjesë të konsiderueshme të maleve në zonën e Brezovicës.
Ky aksion nuk ka pasur cak persona të përveçëm apo të etnive të caktuara. Ky aksion, si çdo aksion tjetër i Policisë së Kosovës, ka pasur cak shkelësit e ligjit që në mënyrë të vazhdueshme, përmes formave të ndryshme kanë shkatërruar pasurinë publike për përfitime personale apo klanore.
Si Ministri e Punëve të Brendshme bashkë me Policinë e Kosovës, mbesim të përkushtuar të ofrojmë siguri, rend dhe ligj për gjithë qytetarët tanë. Shkelësit e ligjit do të luftohen pa asnjë dallim, pa asnjë përjashtim, në gjithë Republikën e Kosovës. /InLajmi/
