Abelard Tahiri, shef i Grupit Parlamentar të Partisë Demokratike të Kosovës, ka kërkuar dorëheqjen e Avokatit të Popullit, Naim Qelaj, pasi që ky i fundit ka hedhur poshtë ankesën e ish-kryetares së Komisionit Qendror të Zgjedhjeve Valdete Daka, kundër vendimit të presidentes Vjosa Osmani për shkarkimin e saj, raporton InLajmi.
“Avokati i Popullit është ai që i mbron të drejtat e njeriut në Republikën e Kosovës, dhe në këtë rast, do të duhej me e dërguar rastin në Gjykatën Kushtetuese. Atij veç Avokat i Popullit nuk mundemi me i thënë, mundemi me i thënë avokat i Vjosa Osmanit”.
“Unë nuk mendoj që ai e meriton me qëndruar në atë pozitë, vlerësimet e tija janë të papranueshme. Vlerësimet se vendimi paska qenë në përputhje me Kushtetutën janë të papranueshme dhe mendoj se pas këtij akti të turpshëm, ai nuk do të duhej më qëndruar në atë zyrë. Do t’i bënte nder edhe vetes edhe pozitës që me jep dorëheqje”.
Tahiri ka thënë se vendimi i Qelajt përbën shkelje të Kushtetutës.
“Kam pasur përpjekje të vazhdueshme dhe nuk kemi arritur dakordim. Unë nuk do të ndalem deri në ditët e fundit, sepse këtu kemi të bëjmë qartazi me shkelje kushtetuese. Deri në ditët e fundit do të merrem me këtë çështje”. /InLajmi/
