Dy diplomatë të lartë amerikanë ishin të parët që dolën në seancat publike dëgjimore për procesin e shkarkimit të presidentit Donald Trump.
William Taylor dhe George Kent kanë pohuar publikisht se ndihma ushtarake ndaj Ukrainës nuk do të zhbllokohej derisa presidenti Volodymir Zelenskiy të zotohej për të hetuar firmën energjetike Burisma, në bordin e së cilës ishte edhe Hunter Binden, i biri i rivalit kryesor të Trumpit, Joe Biden.
Diplomati kryesor amerikan në Ukrainë William Taylor ishte i pari që çeli serinë e dëshmive publike për procesin e shkarkimit që po zhvillohet ndaj presidentit Donalad Trump. Taylor, një diplomat karriere dhe ish-oficer i ushtrisë, ka shërbyer si ambasador në Kiev dhe tani mban postin e të ngarkuarit me punë.
Në dëshminë e tij para Kongresit, diplomati William Taylor, pohoi se në dijeninë e tij, ndihma ushtarake ndaj Ukrainës nuk do të zhbllokohej derisa presidenti Volodymir Zelenskiy të zotohen për të hetuar firmën energjetike Burisma, në bordin e së cilës ishte edhe Hunter Binden, i biri i rivalit kryesor të Trumpit në grarën presidenciale të vitit 2020, Joe Biden.
“Nga mesi i korrikut m’u bë e qartë se hetimi ndaj firmës Burisma dhe dyshimeve për ndërhyrjen ukrainase në zgjedhjet e vitit 2016 ishin kusht për takimit që Zelenskiy kërkonte me Trump-in,” tha Taylor, transmeton gazeta Blic.
Seanca publike e procesit të shkarkimit të Trumpit pritet të kapë një shikueshmëri prej dhjetëra miliona teleshikuesish, ndërsa përveç diplomatit Taylor, para ligjvënëseve u shfaq edhe George Kent, zv./ndihmës sekretar i Shtetit për Çështjet Europiane dhe Euroaziatike.
