Qeveria e Kosovës ka miratuar Projektbuxhetin për vitin 2022, projektbuxhet i cili arrin vlerën në tërësi prej 2 miliardë e 748 milionë euro, raporton InLajmi.
Kryeministri Kurti ka njoftuar se 100 milionë euro janë ndarë për ushtrinë.
“Ushtrinë e kemi projektin tonë madhor dhe për herë të parë kemi ndarë mbi 100 milionë euro ose 1.3% të Bruto Produktit Vendor”, tha ai.
Kurti gjithashtu ka bërë të ditur se do të fillohet ndërtimi i 50 çerdheve në tërë vendin.
“Sot jam takuar me ministrin e Financave, me të cilin e kemi shqyrtuar edhe njëherë buxhetin final. Me këtë buxhet ne do të fillojmë ndërtimin e 50 çerdheve në tërë vendin. Me këtë buxhet do të nisim rrugën Prizren-Tetovë. Për herë të parë kemi buxhetuar mbështetje për Luginën e Preshevës në shumë prej 2 milionë euro”, tha ai.
Gjithashtu ai njoftoi se 40 milionë euro janë ndarë për investimet e Trepçës dhe Telekomit.
“Kemi ndarë buxhetin dhe do të fillojmë projektin e banimit social. Kemi ndarë 20 milionë euro për skemën e punësimit për të rinjë. Kemi ndarë 10 milionë euro për blerjen e ambasadave në shtetet aleate, kemi rritur buxhetin për Bujqsinë mbi 70 milionë euro për herë të parë. 40 milionë euro të tjera i kemi ndarë për investime në Trepçë dhe Telekom”, tha Kurti./InLajmi/
