Nga Zyra e Prokurorit të Specializuar, Cezary Michalczuk, në gjyqin që po mbahet ndaj Salih Mustafës, ka paraqitur, sipas tij, faktet që e bëjnë atë përgjegjës për krimet e pretenduara të kryera në Zllash gjatë vitit 1999, raporton InLajmi.
Ai thotë se i akuzuari pra Mustafa, ka akuzuar pa bazë viktimat e tij si spiunë.
“I akuzuari dhe vartësit e tij akuzonin viktimat si spiunë dhe kolaboracionistë, ndërkohë që ishin të pabazuara këto akuza, ato ishin një hallkë midis konfliktit të armatosur dhe krimeve të kryera nga i akuzuari dhe vartësit e tij”.
Ai ka shtuar se alibia që ka paraqitur Sali Mustafa, nuk është provë që ai është i pafajshëm, duke thënë se të gjitha viktimat e tij ishin shqiptarë të Kosovës dhe i përkisnin LDK-së.
“Asnjë prej provave të mbrojtjes nuk i hedh poshtë akuzat, alibia nuk i hedh poshtë ato. Mbrojtja pretendon se krimet thjeshtë nuk kanë ndodhur fare, asnjëherë. Pretendojnë se nuk ka pasur as marrje në pyetje, rrahje, keqtrajtim apo abuzim. Sipas tyre asnjëra prej këtyre krimeve nuk kanë ndodhur. Provat do të dëshmojnë se këto krime kanë ndodhur dhe që Mustafa është përgjegjës për to. Të gjitha viktimat ishin shqiptarë të Kosovës. Askush nga burrat e ndaluar nuk përbënte kërcënim ushtarak për UÇK-në. Ata po përpiqeshin të siguronin jetesën duke bërë tregti nëpër tregje lokale. “Faji” i tyre ishte se i përkisin një partie të caktuar politike – LDK-së”./InLajmi/
