Ish-ministrja e Financave Hykmete Bajrami, ka bërë thirrje për një qartësim të situatës me shkolla, përcjell InLajmi.
Përmes një postimi në Facebook, Bajrami ka kërkuar nga Kryeministri Kurti që të bëjë një zgjidhje për hapjen e shkollave. Ajo ka thënë se nuk është zgjidhje mbyllja e tyre sikur në kohë lufte.
Ajo ka shtuar se ka kohë për të bërë fushatë elektorale, duke kërkuar një zgjidhje sa më të shpejtë për mësimin.
Postimi i plotë i saj:
Kryeministër bëni zgjidhje për hapjen e shkollave
Sot, si në kohë lufte, shkollat janë të mbyllura. Kjo nuk është zgjidhje. Sot do të duhej të uronim fillimin e vitit të ri shkollor. Sikurse po ndodh në vendet e rajonit. Kur erdhi pandemia, më 11 mars 2020 u mbyllën shkollat por pas një jave filloi mësimi online.
Kryeministër, duhet të bëni zgjidhje, e di që jeni i zënë edhe me punë tjera, edhe më angazhime e punësime partiake, edhe me fushatën elektorale, por po kërkoj nga ju dhe secili anëtar i kabinetit qeveritar të fokusoheni në gjetjen e një zgjidhje për hapjen e shkollave.
Deri tash s’kam parë një rrugë të qartë, një strategji ose dokument të Ministrisë së Arsimit për hapjen e shkollave.
Kryeministër bëni zgjidhje. Ka kohë për fushatë elektorale. Ka kohë për sulme politike.
Qytetarët ju votuan për të bërë zgjidhje dhe fjala është e Juaja./InLajmi/
