Qendra Kosovare për Studime Gjinore ka protestuar në Ferizaj, pas vrasjes së 18-vjeçares, raporton InLajmi.
Protesta po zhvillohet para Stacionit Policor, Gjykatës dhe Prokurorisë në Ferizaj, në shenjë revolte ndaj dhunës ndaj femrave.
Bjeshka Guri nga kjo qendër, ka kërkuar dënim maksimal për vrasësit si dhe më shumë siguri për vajzat. Ajo ka thënë se ky rast është tregues i dështimit institucional
”Në qytetin e Ferizajit edhe një gru u vra në mënyrë arbitrare.Ky rast është tregues i dështimit institucional për të garantuar siguri për gratë. Gratë rrihen, dhunohen edhe në shtëpitë e tyre, vriten edhe në rrugë, edhe nga institucionet tona. Dhuna ndaj grave është sistematike, fajësohen për abuzimet dhe krimet ndaj tyre. Gratë fajësohen edhe për vrasjet që ju ndodhen, të mllefosuna nga ky rast ne po protestojmë si revoltë ndaj dështimit institucional. Ky rast nuk është rast i izoluar, dhuna në baza gjinore janë shqetësim për shëndetin publik në Kosovë. Sa vajza e gra nuk e kanë mbështetjen për mi raportua rastet e tyre, sot kemi dalë me protestua dhe nga kjo protestë i kemi disa kërkesa, dënim maksimal për vrasësit, siguri për vajzat dhe një kërkesë për policinë që të trajtojë me dinjitet rastet”.
Shumë protestuese tjera kanë mbajtur në duar pankarta me mbishkrime të ndryshme, dhe kanë bërë thirrje ndaj institucioneve dhe qytetarëve që vrasja e grave të mos shihet si normale.
“Policia i ka duart me gjak”, “Prokuroria i ka duart me gjak”, “Dënim maksimal për Dardan Krivaqën”, ishin disa nga thirrjet që bënë protestuesit në Ferizaj.
M.O është vajza 18-vjeçare, e cila dyshohet se është vrarë nga Dardan Krivaqa, tashmë i arrestuar me të cilin po bashkëjetonte./InLajmi/
