Vatra e zjarrit në fshatin Armiraj të Fushë-Arrëzit po u afrohen banesave.
Nga ajri po operon helikopteri holandez, ndërsa nga toka po punojnë Forcat e Armatosura, zjarrfikësit e bashkisë dhe punonjës të njësisë administrative dhe shërbimit pyjor.
Po në Fushë-Arrëz ka edhe një vatër tjetër në afërsi të fshatit Flet, por ajo ka një intensitet më të ulët dhe perimetri i tij është nën kontroll.
Ndërsa në Mirditë vijon të jetë aktive vatra e zjarrit pranë fshatit Xhuxhë, por në një njoftim të Ministrisë së Mbrojtjes paraditen e së shtunës, thuhet se nuk ka rrezik për banesat. Gjithsesi autoritetet po e mbajnë situatën nën monitorim.
Në Mirditë mbeten ende aktive vatrat në fshatrat Katund i vjetër dhe Munellë e Domgjon, por me një intensitet më të ulët.
Aktive është edhe një vatër në Pukë ku po punohet për lokalizimin e saj. Flakët vijojnë edhe në Kukës, në Majën e Rrunës prej më shumë se 2 javësh. Terreni ka vështirësuar punën e zjarrfikësve. Shqetësuese është një vatër zjarri brenda parkut natyror Korab-Koritnik zonë e mbrojtur, njofton tvklan.al
Ndërsa në jug vijon të mbetet aktive vatra në vendin e quajtur “Përroi i Vishnjës” në Himarë.
