LVV zyrtarizon Mimoza Kusari-Lila kandidate për Gjakovën

Lëvizja Vetëvendosje ka njoftuar se Mimoza Kusari – Lila do të jetë kandidatja e tyre për kryetare të Komunës së Gjakovës.

LVV përmes një njoftimi për media thotë se bashkëpunimi me Alternativën ka sjellë rezultate të mira.

“Bashkëpunimit të suksesshëm ia mbajmë gjithnjë derën hapur. Fryma e shkëlqyeshme e bashkëveprimit mes Lëvizjes VETËVENDOSJE! dhe Alternativës për Kosovën ka sjellë rezultate të mira në nivel qendror e tash është momenti ta zgjerojmë edhe në nivel lokal. Ndryshimet e mëdha për të cilat ka nevojë Kosova, kërkojnë një bashkërendim të reformave e veprimeve të Qeverisë, me një drejtim transformues nëpër komuna. Përmes këtij memorandumi mes subjekteve tona njoftojmë opinionin publik që kandidatja e Lëvizjes VETËVENDOSJE! për Gjakovë do të jetë Kryetarja e Alternativës për Kosovën dhe njëherit ushtruesja e detyrës së grupit tonë parlamentar, zonja Mimoza Kusari-Lila”, thuhet në njoftim.

Tutje, LVV thekson se “më 14 shkurt u bashkuam në listën ngadhënjyese për referendumin e Republikës, në 17 tetor duhet të bashkohemi edhe një herë, për komunën, fshatin e lagjen tonë”, shkruan Telegrafi.