Kosova ka rënë në pozitën e 21-të në renditjen e përgjithshme të medaljeve olimpike pas ditës së 9-të të garave në Lojërat Olimpike 2021 në Tokio.
Renditjes së përgjithshme vijon t’i prijë Kina me 51 medalje në përgjithësi, prej të cilave 24 të arta.
Pas saj vijnë Shtetet e Bashkuara me 59 medalje në përgjithësi, por 20 të arta dhe në vendin e 3-të renditet Japonia me 17 medalje të arta.
Kosova ka rënë në pozitën e 21-të me 2 medalje të arta, por duke i lënë mbrapa shumë fuqi botërore, si dhe të gjitha shtetet fqinje.
Kosova i ka fituar 2 medalje olimpike në Tokio, të 2-ja të arta dhe të 2-ja në sportin e xhudos.
Distria Krasniqi e fitoi medaljen e artë në kategorinë 48 kilogramë në fund javë, e cila ishte e para për Kosovën në Tokio dhe e para për të në karrierë. Nora Gjakova e përsëriti suksesin e saj duke e fituar medaljen e artë në kategorinë 57 kilogramë.
Vendit tonë i ka mbetur vetëm edhe një garues në Tokio 2020, mundësi Egzon Shala.
Shala do të përballet me mundësin bjellorus Dzianis Khramiankou në rrethin e parë në peshën e rëndë, 125 kilogramë, të enjten më 5 gusht, raporton Gazeta Express.
Kosova i dërgoi 11 atletë në Lojërat Olimpike në Tokio, prej të cilëve gjashtë ishin me normë olimpike. Duke e parë numrin e atletëve pjesëmarrës, rezultati i Kosovës vlerësohet të jetë fantastik.
