Qytetarët e Kosovës të cilët janë të prekur me diabet po përballen me mungesë të insulinave nëpër Qendrat e Mjekësisë Familjare, përcjell InLajmi.
Kjo gjë ka bërë që qytetarët të mbesin që disa muaj pa insulina, derisa jetojnë me shpresën që Ministria e Shëndetësisë do ta zgjidh një problem të tillë.
Lidhur me këtë rast ka reaguar ashpër, i pari i AAK-së, Ramush Haradinaj, përmes rrjeteve sociale, ndërkaq tha se e drejta e pacientit me diabet është e garantuar me ligj. Nërsa donacionet nga jashtë edhe pse të mirëseardhura, nuk janë zgjidhje e problemit.
Haradinaj tha se urgjentisht, Ministria e Shëndetësisë duhet të sigurojë sasinë e duhur të insulinës dhe të ketë strategji të qartë që mos të ketë ndërprerje të këtilla.
Postimi i plotë i tij:
Mbi 28 mijë qytetarë të Kosovës, prej tyre mbi 700 fëmijë, janë të regjistruar si marrës të insulinës.
Që nga vitet e para të pasluftës, Ministria e Shëndetësisë ka siguruar sasinë e duhur, me ndërprerje të vogla.
E drejta e pacientit me diabet është e garantuar me ligj. Donacionet nga jashtë edhe pse të mirëseardhura, nuk janë zgjidhje e problemit.
Ka tre muaj, që diabetikët nuk e kanë ndjerë dorën e shtetit. Insulinat mungojnë plotësisht.
Çfarë shoqërie duam të ndërtojmë? Shoqëri ku të sëmurët kronik lejohet të vdesin nga pakujdesia?
Urgjentisht, Ministria e Shëndetësisë duhet të sigurojë sasinë e duhur të insulinës dhe të ketë strategji të qartë që mos të ketë ndërprerje të këtilla.
Ky është edhe vet qëllimi i pushtetit: të kujdeset për qytetarët.
RH
/InLajmi/
