I dërguar special i BE-së për Kosovën, Tomas Szunyog ka bërë të ditur se Bashkimi Evropian do të investojë 2 milionë euro për rindërtimin e 14 shtëpive në Janjevë, raporton InLajmi.
Shtëpitë do të rindërtohen në mënyrë që të ruhet trashëgimia kulturore në këtë vend, ka thënë Szyunyog, duke shtuar se Janjeva do të bëhet shembull i zhvillimit edhe për qytete të tjera.
“Kemi ardhur këtu që të vizitojmë këtë pjesë, sepse është një vend i veçantë dhe multi-kulturor, dhe kulturën këtu. E pamë për së afërmi situatën infrastrukturore dhe gjendjen e këtij komuniteti dhe ne duam ta ruajmë këtë pjesë dhe këtë vend sepse kjo i jep rëndësi turizmit të Kosovës. Ne duam ta financojmë këtë vend andaj planifikojmë të ndajmë 2 milionë euro që do ndahen nga vizita që kemi bërë këtyre shtëpive dhe vendeve, nuk është larg Prishtinës dhe jemi të gjithë bashkë në këtë projekt që Janjeva të bëhet shembull i zhvillimeve të mira”, tha ai.
Ndërsa, Ulrika Richardson, koordinatore e OKB-së në Kosovë, e ka parë Janjevën si vend me potencial për zhvillim të turizmit, duke thënë që duhet të ketë më shumë investime.
“Infrastruktura ka shumë rëndësi për mbrojtjen e të gjitha aspekteve sepse ka shumë potenciale që e bëjnë Janjevën e bukur dhe është një vend atraktiv dhe tërheqës”, tha Richardson.
Edhe ministri i Mjedisit, Planifikimit Hapësinor dhe Infrastrukturës, Liburn Aliu, u shpreh se projekti parasheh rindërtimin e 14 shtëpive.
“Patëm mundësi që të shihnim Janjevën dhe të prezantojmë projektin e rindërtimit të 14 shtëpive. Projekt i financuar nga BE-ja dhe mendoj që me një trajtim të hollësishëm do të kishim një mbrojtje të mjedisit shumë të mirë”, tha Aliu.
Këtë projekt e mbështeti edhe Kryetari i Komunës së Lipjanit, Imri Ahmeti i cili u shpreh se zhvillimi i këtyre objekteve është i rëndësishëm dhe ia vlenë të investohet.
“Është kënaqësi që t’i ndërtojmë këto objekte që do të ndikojnë në ruajtjen e këtyre monumenteve dhe u shprehim gatishmërinë në të gjitha pikëpamjet që synimet të realizohen”./InLajmi/
