Kryetari në detyrë i Partisë Demokratike të Kosovës, Enver Hoxhaj ka kujtuar 22 vjetorin e Marrëveshjes së Kumanovës, përcjell InLajmi.
Hoxhaj përmes një postimi në Facebook, është shprehur se falë NATO-s dhe dëshmorëve të UÇK-së, Kosova sot frymon si një shtet i pavarur dhe është faktor stabiliteti në rajon.
Kujtojmë se nënshkrimi i Marrëveshjes së Kumanovës i dha fund luftës me Serbinë, ku kombet mbështetëse të NATO-s bombarduan dhe dëbuan ushtrinë serbe nga vendi.
Postimi i plotë i tij:
22 vjet nga nënshkrimi i Marrëveshjes së Kumanovës që i dha fund luftës në vendin tonë. Për 78 ditë, kombet që u rreshtuan në anën e të drejtës historike nën ombrellën e NATO-s, bombarduan deri në dorëzimin dhe dëbimin e Serbisë nga Kosova, duke parandaluar gjenocidin e planifikuar të Millosheviqit. Sot, falë NATO-s dhe dëshmorëve të UÇK-së, Kosova frymon e lirë si shtet i pavarur dhe është faktor stabiliteti për rajonin. Përjetësisht mirënjohës. /InLajmi/
