Kryetari i Parlamentit të Shqipërisë, Gramoz Ruçi, pas takimit me homologun e tij kosovar, Glauk Konjufca, ka thënë se është e rëndësishme që Kosova të ruaj avantazhin e saj ndaj Serbisë ne negociata sepse sipas tij, Kosova i ka të gjitha arsyet dhe mundësitë që të jetë një partner më i besueshëm se sa Serbia në raport me SHBA-në dhe BE-në.
Tutje, Ruçi thotë se të gjithë duhet ta kuptojnë që me SHBA-të dhe BE-në gjithçka është e mundur për Kosovën, por pa to, gjithçka është më e vështirë dhe e rrezikshme.
“Vizioni i SHBA-ve dhe BE-së është e vetmja perspektivë realiste dhe e dobishme për Kosovën dhe Serbinë në rajon. Shqipëria vlerëson shumë qëndrimin dinjitoz të ish drejtuesve të institucioneve të Kosovës dhe të UÇK-së dhe gatishmërinë e tyre për t’i dalë përballë drejtësisë dhe zbardhur të vërtetën e luftës së madhe për shpëtimin e popullit të saj nga krimet dhe gjenocidi serb”, ka thënë Ruçi.
Më tej, kryekuvendari shqiptar thotë se e vlerësojnë qëndrimin e Qeverisë së Kosovës, Kuvendit, Presidencës, të forcave kryesore politike dhe liderëve të saj për maturin, për qetësinë, për unitetin dhe bashkimin e nevojës për konsultime për të pasur një qëndrim shumë më të unifikuar për dialogun me Serbinë.
“Sepse për ne në Shqipëri, është Serbia ajo që ka kryer gjenocid, ajo që ka kryer krime kundër, ka kryer krime lufte dhe ka fshehur kriminelë në kërkim për dekada të tëra dhe që nuk ka bashkëpunuar me Gjykatën Ndërkombëtare të Drejtësisë në Hagë dhe sot përpiqet t’i glorifikojë kriminelët e vet që i ka mbrojtur dhe i ka fshehur”, transmeton Klan Kosova.
“Koha punon për Kosovën, sepse Kosova është në anën e duhur dhe të drejtë të historisë dhe në nuk do të rreshtim së punuari e luftuari për të”, ka thënë Ruçi në konferencë për media.
