Në betejën për të mundur koronavirusin, India ka porositur 300 milionë doza të një vaksine të pamiratuar të COVID 19. Vaksina pa emër e prodhuar nga firma indiane Biological E është në fazën e 3 të testimit.
Sipas një deklarate të bërë nga qeveria federale thuhet se vaksina ka treguar “rezultate premtuese” në 2 fazat e para.
Dozat e saj mendohet të jenë në dispozicion të njerëzve në muajt e ardhshëm.
Megjithëse numrat i rasteve me Covid ka rënë ndjeshëm, India ende po regjistron më shumë se 100.000 persona të infektuar në ditë. Më pak se 10% e popullsisë ka marrë të paktën një dozë të vaksinës. Vendi deri më tani ka regjistruar mbi 340.000 humbje me këtë virus, mirëpo ekspertët thonë se shifra mund të jetë shumë më e madhe, shkruan KlanNews.
Qeveria federale e Indisë, e udhëhequr nga Kryeministri Narendra Modi, është kritikuar për keqmenaxhimin e situatës pasi nuk ka porositur në kohë vaksinat indiane apo të prodhuesve të huaj.
