Në Klinikat e Qendrës Klinike Universitare të Kosovës gjithnjë e më shumë po vërehet shtimi i kërkesave të shërbimeve spitalore për pacientët post-COVID. Por sa i përket rasteve klinike me koronavirus gjendja është e qetë dhe stabile.
Kështu bën të ditur drejtori i Shërbimit Spitalor Klinik Universitar të Kosovës, Valbon Krasniqi, i cili thotë se gjendja aktuale në klinika është e qetë dhe stabile.
Ai thotë se në të ardhmen duhet të mendohet për trajtimin e ndërlikimeve te pacientët që e kanë kaluar koronavirusin.
“Si rezultat i zvogëlimit të rasteve të reja të të infektuarve nuk ka pasur fluks të pacientëve që kanë ardhur për t’u shtrirë në spitalet tona. Tani ne po ballafaqohemi gjithnjë e më shumë me kërkesa për shërbime spitalore për pacientët që kanë kaluar koronavirusin dhe që kanë pasur komplikime ose ndërlikime sidomos në organet e mushkërive dhe nga një numër për shembull prej 65 % që i kemi sot të shtrirë në Klinikën e Pulmologjisë, 49 prej tyre i kemi negative sa i përket testin PCR për koronavirus.
Por për shkak të gjendjes së përgjithshme vazhdojnë të qëndrojnë më tutje në Klinikën e Pulmologjisë ose janë liruar më herët por përsëri janë kthyer. Duket që në të ardhmen duhet të mendohet edhe për shërbimet të ashtuquajtura për pacientët post-COVID në mënyrë që të mjekohen komplikimet ose ndërlikimet që kanë mundur të ndodhin tek këta pacientë“, tha ai.
Për lirimin e masave anti-COVID, Krasniqi thotë se këto masat janë në përputhje me situatën epidemiologjike.
Por, ai kërkon respektim të masave në fuqi nga të gjitha palët.
Sipas Krasniqit ardhja e mërgatës nuk paraqet shumë rrezik për përhapje të infeksionit pasi tashmë edhe vendet ku ndodhet mërgata janë në proces të mbarë të vaksinimit anti-COVID.
“Tani ne jemi në një situatë tjetër jemi në proces të vaksinimit si Kosovës, ndërkohë që edhe shumica e shteteve të tjera në rajon dhe Evropë kanë ecur mirë me vaksinim dhe nëse i referohemi mërgimtarëve që mund të vijnë në Kosovë ata mund të paraqesin edhe në anën tjetër rrezik ta marrin infeksionin këtu dhe ta dërgojnë në vendin e tyre. Pra, nuk mund të shihen vetëm nga njëra anë. Me rendësi është që sidomos në shtetet ku ekziston popullata e mërgatës sonë tashmë ka ecur mjaftë mirë dhe po shpresojmë që pjesa më e madhe janë vaksinuar që të jemi më të mbrojtur”, theksoi Krasniqi në një intervistë për KosovaPress.
Pas rënies së shifrave të të infektuarve me koronavirus tanimë janë mbyllur tri klinikat COVID, ajo Internistike, e Mjekimit Intensiv Qendror edhe ajo e Mjekimit Sportiv e cila ishte hapur enkas vetëm për shtrimin e pacientëve me koronavirus.
E për këtë objekt i cili është i mbyllur, Krasniqi thotë se 95 shtretërit e kësaj klinike do të vazhdojnë të jenë të gatshëm nëse do të ketë nevojë për shtim të kapaciteteve spitalore për pacientët e prekur me koronavirus.
Kosova ka nënshkruar kontratën me Pfizer dhe deri në fund të vitit pritet të arrijnë 1.2 milion doza të kësaj vaksine. Kurse deri në fund të vitit Kosova synon të vaksinoj 60 % të popullatës.
Ndërsa, tutje po vazhdon procesi i vaksinimit anit-COVID me vaksinat AstraZeneca të cilat janë dhuruar për qytetarët e Kosovës nga COVAX-i. Po nga kjo Aleancë gjatë kësaj jave janë pranuar edhe mbi 100.000 vaksina Pfizer.
