Ministri i Mbrojtjës së Kosovës, Armend Mehaj së bashku me Ministrin e Mbrojtjës së Shqipërisë, Niko Peleshi kanë nënshkruar marrëveshje bashkëpunimi e cila përfshinë rritjen e bashkëpunimit ne mes 2 shteteve shqiptare, ku përfshinë rritjen e numrit të aktiviteteve që do të realizohen së bashku nga 2 ushtritë, përcjell InLajmi.
Ministri Mehaj ka thënë se ka kënaqësinë të prezantojë një marrëveshje me Shqipërinë.
“Kam kënaqësinë të prezantoj arritjen e marrëveshjes midis Ministrisë së Mbrojtjes së Republikës së Shqipërisë dhe Ministrisë së Republikës se Kosovës, një bashkëpunim në fushën e mbrojtjes. Njëra prej marrëveshjes që e kemi diskutuar e arritur së bashku është realizimi i aktiviteteve të përbashkëta në nivel profesional, pra akademinë në mes dy ministrive, është koordinimi i këshillimit nga ana e ekspertizës nga Ministria e Mbrojtjes së Shqipërisë, rendimin e duhur në çështje politike, ushtarake, ligjore për integrimin e Republikës së Kosovës në drejtim te NATO-s dhe iniciativa rajonale. Një pikë tjetër e rëndësisë së madhe është ngritja e stërvitjeve te përbashkëta ushtarake dhe angazhime dhe pjesëmarrje në operacione ndërkombëtare në të ardhmen”, tha Mehaj.
Ndërsa ministri i Mbrojtjes së Shqipërisë, Niko Peleshi rikonfirmoi gatishmërinë e Shqipërisë për mbështetje ndaj Kosovës në të gjitha proceset integruese.
“Shqipëria ka qenë dhe do të mbetët mbështetëse e pa kursyer e të gjitha proceseve integruese të Kosovës më strukturat euroatlantike. Ne kemi përshkuar atë rrugë të cilën Kosova aspiron, pra rrugën e anëtarësimit në NATO…Integrimin e gjithë Ballkanit perëndimor në strukturat euroatlantike është i rëndësishëm për Shqipërinë, është i rëndësishëm për Kosovën, është i rëndësishëm edhe për vet Evropën. Kështu që Shqipëria ngelet e interesuar përkrah gjithë vendeve të tjera në rajon për të ecur përpara drejt Bashkimit Evropian, drejtë integrimit të tyre në NATO” , tha ai. /InLajmi/
