Kryetari i Komunës së Rahovecit Smajl Latifi së bashku me drejtorin e Bujqësisë Berat Duraku, të shtunën kanë vizituar disa blegtorë të asaj komune, përcjellë InLajmi
Latifi tha se masat e reja anti-Covid ka bërë që ekonomia të ketë ulje, poashtu edhe mbyllja e gastronomisë ka bërë që 5 mijë qengja të mos kenë mundësi të shiten.
“Fermerët tanë kanë nevojë jo vetëm për ndihmë nga institucionet shtetërore qendrore e lokale, por edhe për përkrahje nga gjithë shoqëria”, tha ai.
Postimi i plotë i tij:
Pas shqetësimeve të ngritura nga fermerët rahovecas, bashkë me drejtorin e bujqësisë, z. Berat Durakun, vizituam sot disa nga blegtorët, si një sektor ku mund të investohet dhe sigurohet punësim edhe për të tjerët.
Komuna jonë ka humbur shumë në të gjithë sektorët, dhe masat e reja si ajo e mbylljes totale po sjellin pasoja në ekonominë tonë, në rastin konkret, nga blegtorët u informova se afër 5000 krerë qengja, tanimë janë të gatshëm për treg, por që efektet e pandemisë Covid 19 dhe mbyllja e gastronomisë ka bërë të pamundur si shitjen e tyre, poashtu edhe të produkteve që prodhohen po nga blegtoria.
Një problem i tillë është mjaft serioz do të dërgonte në një kolaps, falimentimin e stallave, mbetjen e punëtorëve pa punë, këputjen e një hallke të rëndësishme të zinxhirit që ndikon direkt në mirëqenien sociale dhe zhvillimin e ekonomisë familjare.
Fermerët tanë kanë nevojë jo vetëm për ndihmë nga institucionet shtetërore qendrore e lokale, por edhe për përkrahje nga gjithë shoqëria. Të gjithë ne duhet ta shohim si obligim moral që t’i ndihmojmë të dalin nga situata e vështirë e tyre duke konsumuar sa më shumë prodhime vendore. /InLajmi/
