Kryetari i komunës së Drenasit, Ramiz Lladrovci ka përkujtuar dëshmorët Xhevat e Bedri Demaku dhe Imer Shala, në Abri, përcjellë InLajmi.
Në shënimin e 22 vjetorit të rënies së tyre Lladrovci së bashku me Gjeneral Xhevahir Gecin, pjesëtarët e FSK-së, familjarët e dëshmorëve, veteranët e UÇK-së, zyrtarët e komunës dhe qytetarët kanë bërë homazhe në nderim të tyre.
Lladrovci tha se vepra se dëshmorëve të rënë për liri do të jetë mesazh për brezat ardhshëm se sa e çmuar është liria.
Postimi i plotë i tij:
Me rastin e 22 vjetorit të rënies në altarin e lirisë, sot, së bashku me Gjeneral Xhevahir Gecin, pjesëtarët e FSK-së, familjarët e dëshmorëve, veteranët e UÇK-së, zyrtarët e komunës dhe qytetarët, kemi bërë homazhe dhe vendosëm lule të freskëta pranë vendit ku prehen dëshmorët Xhevat e Bedri Demaku dhe Imer Shala, në Abri.
Jeta dhe vepra e tyre heroike, është dhe do të jetë mesazh për brezat e tashëm dhe ata që do të vinë se sa e çmuar është liria dhe sa duhet atdheu. Sakrifica e tyre, është pjesa më e ndritur e historisë tonë, të cilën ne e kujtomë me nderim të thellë e të sinqertë, ashtu siç kujtojmë brezat e tërë që u sakrifikuan për lirinë tonë.
Sot, u përkulem me nderim, para jetës dhe veprës së tyre atdhetare, e cila mbetet udhëzuese për punën tonë të çdo ditshme, përkushtimin dhe angazhimin për fuqizimin e shtetit, zbatimin e ligjit dhe barazisë para ligjit.
I përhershëm është kujtimi për dëshmorët Xhevat Demaku, Bedri Demaku dhe Imer Shala!
Lavdi Ushtrisë Çlirimtare të Kosovës! /InLajmi/
