Vjosa Osmani të enjtjen ka përkujtuar shënimin e 22 vjetorit të masakrës së Krushës së Madhe duke thënë se kjo masakër është dëshmi e gjenocidit të Serbisë në Kosovë, përcjellë InLajmi.
Osmani po ashtu nuk la pa përmendur edhe fatin e të pagjeturëve e cila tha se kjo çështje është brenga më e madhe e Kosovës.
Ajo tha se do të kërkojnë drejtësi për Masakrën e Krushës kudo dhe kurdo duke thënë se liria nuk ka kuptim nëse ekzekutorët nuk marrin përgjegjësi për veprimet e tyre.
Postimi i plotë i saj:
Këto ditë bëhen 22-vjet nga masakra e Krushës së Madhe, e cila përveç se dëshmi autentike e veprimit të regjimit gjenocidal të Serbisë, mbetet ende plagë e hapur për një pjesë të familjarëve të këtij fshati.
Janë shumë të pagjetur, fati i të cilëve ende mbetet peng, brengë dhe ankth jo vetëm për familjarët, por edhe për shtetin e Kosovës.
Në një aksion dyditor, regjimi serb manifestoi egërsi të paparë, duke ndarë burra e djem nga gratë e nënat e tyre dhe duke ekzektutuar 243 persona.
2 dekada më pas, masakra e Krushës së Madhe është zëri i ndërgjegjes që thërret për drejtësi dhe zbardhje të fatit të të pagjeturve.
Duke kujtuar këtë ditë, ne sot e kuptojmë peshën dhe çmimin që paguam për lirinë e vendit!
Liria nuk ka kuptim pa adresimin e përgjegjësisë për ekzekutorët e kësaj masakre, siç nuk mund të ketë paqe të qëndrueshme në rajon!
Ne nuk do ndalemi duke e thënë të vërtetën për Masakrën e Krushës, kudo dhe kurdo. Ne nuk do të ndalemi asnjëherë që t’i rrijmë afër familjeve dhe t’u themi se dhimbja e tyre është edhe e jona dhe që si institucione shtetërore nuk do zbrapsemi në përpjekjen për të kërkuar drejtësi!
I përjetshëm qoftë kujtimi për 243 të vrarët e Krushës së Madhe! /InLajmi/
