Ditrin Selmani është vetëm 9 vjeçar dhe ka njohuri të shumta për gjëra të ndryshme.
Interesat e tij janë pak më të veçanta. I pëlqen astronomia, shkencat natyrore, arti e së fundi po i pëlqen shumë edhe mjekësia.
Është ky Ditrin Selmani nga Prishtina i cili tregon për librat e mjekësisë që ka dhe për funksionin e organeve trupore që ka mësuar nëpër libra.
Ditrini tregon disa nga punimet e tija, ndonëse ato janë të shumta, por shumë unike.
Ai gjithashtu tregon se kur të rritet dëshiron të bëhet pulmolog.
“Kur të rritem kam dëshirë të bëhem pulmolog, sepse mushkëritë janë organe që kam më së shumti dëshirë t’i kem të shëndosha në krahasim me organet tjera”, thotë djaloshi.
Talentin e tij e zbuloi nëna e tij, Valmira , në moshën 2 vjeçare. Ajo ka treguar se inteligjenca e tij, sipas testit ka dalë të jetë shumë e lartë.
“Ditrini qysh në moshë të vogël kishte filluar me disa figura gjeometrike të tregojë se ka intelegjencë të lartë. E kemi testuar në moshën gjashtë vjeçare në institucionin “Atomi” ku ka arritur rezultatet të larta. IQ i ka dalë diku 136. Ka treguar rezultat të mirë”, thotë e ëma e Ditrinit Valmira Selmani, shkruan telegrafi.com
Mes njohurive të shumta, nëntë vjeçari Ditrin Selmani, me qetësinë që ka arrin të zgjidhë çdo problem matematikor dhe të njoh çdo objekt në hapësirë.
