Në një konferencë për medie është njoftuar se shefi i Zyrës së BE-së në Kosovë, Tomash Sunjog, ka nënshkruar 3 projekte me vlerë prej 11.8 milionë euro, përcjell InLajmi
Këto projekte sigurojnë mbrojtje sociale për grupet e cenueshme në Kosovë gjatë pandemisë së Coronavirusit.
Sunjog theksoi se pandemia ka krijuar një ndjenjë izolimi mes individëve dhe e ka destabilizuar jetën shoqërore, duke shkaktuar shqetësime mendore dhe fizike si kurrë më parë.
“Prandaj, Zyra e BE-së në Kosovë është e kënaqur që po e lanson këtë program që do të kontribuojë në nxitjen e solidaritetit dhe kohezionit social në komunitetet tona të tronditura kaq thellë nga efekti dramatik i pandemisë dhe ndikimi i saj në jetën e njerëzve.”
Ai deklaroi poashtu se “tashmë, teksa vaksinat bëhen gradualisht të disponueshme, BE-ja po mobilizon të gjitha burimet e saj për të siguruar qasjen e partnerëve të Ballkanit Perëndimor në vaksinat Covid-19.
Projektet do të zbatohen nga Programi për Zhvillimit i OKB-së (UNDP), Save the Children, dhe Organizata Ndërkombëtare për Migracionin.
Programi do të zbatohet në koordinim me Ministrinë e Punës dhe Mirëqenies Sociale dhe Qendrat Komunale për Punë Sociale, si institucionet kryesore përgjegjëse për politikat sociale dhe ndarjen e skemave dhe shërbimeve të ndihmës.
Ai po ashtu do të mbështesë edhe organizatat jofitimprurëse që mbrojnë dhe ndihmojnë fëmijët, gratë dhe familjet e pafavorizuara, duke përfshirë edhe ato nga komunitetet pakicë dhe të paregjistruara zyrtarisht në sistemin e mirëqenies sociale./InLajmi/.
