Gjykata Themelore e Prizrenit ka caktuar masën e paraburgimit prej një muaj ndaj të pandehurit M.H., për shkak të dyshimit të bazuar se ka vrarë babanë e vet më 25 maj.
“Gjyqtari i procedurës paraprake– Xheladin Osmani, kërkesën e prokurorit të shtetit për caktimin e masës së paraburgimit kundër të pandehurit e ka aprovuar si të bazuar konform dispozitave të KPPRK-së dhe të njëjtit i është caktuar masa e paraburgimit në kohëzgjatje prej një (1) muaj, ashtu që kjo masë të pandehurit do ti llogaritet prej datës 25.12.2020 deri me datën 24.01.2020”, thuhet nga Gjykata Themelore e Prizrenit, raporton koha.net.
Gjithashtu në seancën dëgjimore prokurori i shteti ka propozuar që ndaj të pandehurit M.H., të bëhet ekzaminimi psikiatrik. Andaj Gjykata duke vepruar sipas propozimit të prokurorit ka lëshuar urdhëresë për ekzaminim psikiatrik, që duhet të kryhet brenda afatit prej 2 javëve nga dita e lëshimit të urdhëresës.
M.H. akuzohet se më 25 dhjetor para shtëpisë kishte vrarë babain e vet me një thikë kuzhine, pas një mosmarrëveshjeje. Ai e kishte goditur disa herë me thikë babanë, i cili kishte zbritur nga kampioni.
Familjarët kanë treguar se M.H. ka probleme psikike.
“Gjyqtari i procedurës paraprake, ka vlerësuar edhe masa tjera për sigurinë e pranisë së të pandehurit në procedurë, mirëpo ka ardhur në përfundim se në rastin konkret të njëjtat janë të pamjaftueshme për zhvillimin e rregullt të procedurës penale, duke pasur parasysh faktet dhe rrethanat e lartpërmendura, mënyrën dhe rrethanat e kryerjes së veprës penale, sipas mendimit të gjykatës caktimi i masës së paraburgimit tani për tani është i domosdoshëm dhe i arsyeshëm”, thuhet nga Gjykata Themelore e Prizrenit.
