Kryetari i Odës së Farmacistëve të Kosovës, Arianit Jakupi ka reaguar pasi vaksina kundër COVID-19 janë dërguar në veri të vendit nga Ministria e Shëndetësisë së Serbisë, përcjell InLajmi.
Ai tha se vaksinat konsiderohen produkte medicinale dhe si të tilla duhet t’i nënshtrohen autorizimit për marketing – regjsitrimit në AKPPM.
Postimi i plotë i tij:
“Vaksinimi në Republikën e Kosovës
Vaksinat konsiderohen produkte medicinale dhe si të tilla i nënshtrohen autorizimit për marketing – regjsitrimit në AKPPM. Pas regjistrimit për çdo import duhet të merret leja për import e cila gjithashtu merret nga AKPPM.
Sa i përket furnizimit të qyteteve në veri nuk ka ndonjë dallim me qytetet tjera, me gjithë tendencën dhe kërkesat përgjatë viteve, por kjo çështje ligjërisht ka përfunduar në Bruksel në vitin 2014 dhe këto procedura vlejnë për tërë territorin e Republikës së Kosovës dhe për të gjitha produktet medicinale nga cilido prodhues qofshin.
Çdo procedurë që përfshin produktet medicinale pa marrë leje nga AKPPM është shkelje e ligjeve të Republikës së Kosovës dhe gjithashtu shkelje e marëveshjes së Brukselit”./InLajmi/
