Asociacioni i Gazetarëve të Kosovës ka reaguar ndaj gjuhës ofenduese dhe kërcënimeve të anëtares së Lidhjes Demokratike të Kosovës, Melihate Tërmkolli, ndaj gazetarit Arsim Lani, përcjell InLajmi.
Tërmkolli përmes një mesazhi elektronik e ka quajtur udhëheqësin e emisionit “Frontal” Lani “bërllok” dhe “i pafytyrë”, për shkak se siç e ka bërë të ditur gazetari për AGK-në, ajo nuk ishte njoftuar paraprakisht për të ftuarin tjetër në studio. Krahas ofendimeve, ajo gjithashtu e ka kërcënuar gazetarin, duke i thënë se “do ta paguajë për mundin dhe ftohjen” që sipas saj, gazetari i ka shkaktuar gjatë qëndrimit në objektet e televizionit.
Në reagimin e AGK-së thonë se për ta është shqetësuese fakti që gazetaret janë pre e ofendimeve nga politikanët duke e cënuar kështu lirinë e shprehjes dhe të mediave.
Për AGK-në është shqetësuese fakti që gazetarët janë ende pre e ofendimeve të tilla nga zyrtarët politikë. Gjuha e tillë denigruese e përdorur nga Tërmkolli, është tërësisht e papranueshme dhe e cenon lirinë e shprehjes dhe medieve.
AGK-ja u bën thirrje zyrtarëve politikë që ta njohin rolin e gazetarëve në një shoqëri demokratike dhe të përmbahen nga ofendimet në drejtim të tyre.
Reagimi i plotë i AGK-së
AGK dënon gjuhën denigruese dhe kërcënuese të anëtares së LDK-së, Melihate Tërmkolli, në drejtim të gazetarit Arsim Lani
PRISHTINË 01.12.2020 – Asociacioni i Gazetarëve të Kosovës – AGK, e vlerëson tërësisht të papranueshme gjuhën ofenduese dhe kërcënimet nga anëtarja e Lidhjes Demokratike të Kosovës – LDK, Melihate Tërmkolli, në drejtim të gazetarit të Televizionit 7, Arsim Lani.
Tërmkolli gjatë ditës së djeshme përmes një mesazhi elektronik të dërguar pas emisionit ‘Frontal’ udhëhequr nga Lani, e ka quajtur atë “bërllok” dhe “i pafytyrë”, për shkak se siç e ka bërë të ditur gazetari për AGK-në, Tërmkolli nuk ishte njoftuar paraprakisht për të ftuarin tjetër në studio. Krahas ofendimeve, ajo gjithashtu e ka kërcënuar gazetarin, duke i thënë se “do ta paguajë për mundin dhe ftohjen” që sipas saj, ai ia ka shkaktuar.
Për AGK-në është shqetësuese fakti që gazetarët janë ende pre e ofendimeve të tilla nga zyrtarët politikë. Gjuha e tillë denigruese e përdorur nga Tërmkolli, është tërësisht e papranueshme dhe e cenon lirinë e shprehjes dhe medieve.
AGK-ja u bën thirrje zyrtarëve politikë që ta njohin rolin e gazetarëve në një shoqëri demokratike dhe të përmbahen nga ofendimet në drejtim të tyre./InLajmi/
