Muaji nëntor shënoi numrin më të lartë të viktimave nga virusi korona. Raportet ditore të ISHP-së tregojnë se çdo 50 minuta ka ndërruar jetë nga një pacientë i infektuar me CoVid-19. Ky muaj po mbyllet me mbi 750 vdekje, incidencë e cila vendin tonë e rendit të 8 në botë. Rritja e vdekshmërisë në këto katër javë është trefishuar, gjegjësisht javën e parë 111 dhe të fundit mbi 307 pacientë ndërruan jetë.
Por, e rëndësishme për Ministrinë e Shëndetësisë është se të gjithë kanë vdekur në kushte spitalore.
Sipas tyre të gjithë pacientët kanë marrë trajtimin e duhur mjekësor, por numrin e lartë të vdekjeve e arsyetojnë me komplikimin e sëmundjeve të tjera, si dhe paraqitja e vonshme tek mjeku. Megjithëse, edhe numri i rasteve aktive ka arritur mbi 21 mijë, më pak se 7% janë në kurim spitalor. Nga MSH thonë se në 24 orët e fundit janë pranuar rreth 60 pacientë, prej tyre 38 vetëm në spitalet e Shkupit.
Aktualisht në repartet infektive dhe qendrat për kovid në të gjithë vendin janë duke u kuruar 1296 pacientë ndërsa 157 shtretër janë të lirë. Në Shkup, në kushte spitalore po trajtohen 480 pacientë dhe ka rreth 40 shtretër të lirë – thonë nga Ministria e Shëndetësisë.
Pas një takimi me drejtorët e klinikave, Ministri Filipçe shkroi se situata është nën kontroll me kapacitet spitalore.
Ambientet spitalore te “Malla Bogorodica” të tri spitaleve private njoftojnë se janë të gatshme që sot të pranojnë 100 pacientë. Por, thonë se ende nuk kanë nënshkruar marrëveshjen me MSH që i gjithë trajtimi të rregullohet përmes Fondit, ashtu siç kishin rënë në ujdi për ta bërë kovid qendrën e re, shkruan ALSAT MK.
I gjithë kapaciteti për pranim të pacientëve me Kovid është 1500 shtretër, 1/3 prej tyre në Shkup.
