Kryeministri Avdullah Hoti ka njoftuar gjatë ditës së djeshme se ka filluar shpërndarja e 60 milionë eurove për bizneset në kuadër të Fondit për Rimëkëmbje Ekonomike.
Këtë po e cilëson si një lajm shumë të mirë për bizneset Kryetari i Sindikatës së Pavarur të Sektorit Privat të Kosovës Jusuf Azemi.
“Me ndarjen e mjeteve, bizneset do të kenë një kapital ose freskim të ri. Përpos anës materiale që do të përfitojnë kompanitë, ku numri i punëtorëve është 206 mijë e 786, mendoj që bizneset edhe në aspekt moral do të fitojnë diçka, sepse po e ndjejnë veten se shteti është më afër tyre sesa që ka qenë deri tani”.
“Ne si sindikatë mendojmë që pakoja është vonuar dhe ka krijuar huti dhe zbrazëti. Po ashtu ka krijuar edhe kompani që kanë falimentuar për një shumë të vogël të mjeteve nga shteti. Megjithatë, siç thotë një fjalë popullore, më mirë vonë sesa hiç”.
Por, sa do t’i ndihmojë kjo punëtorëve të sektorit privat?
“Kjo kryesisht varet nga pronarët e kompanive, sepse të gjitha këto mjete do të shkojnë në buxhetin e kompanive. Kjo është ndihmesë për kompanitë. Është një stimulim i pronarit të kompanive, prandaj se sa do ta ndjejnë punëtorët e kompanive këtë stimulim varet krejtësisht nga pronari. Në këtë pako nuk është paraparë që këto mjete të ndahen për punëtorë, sepse për punëtorë ka qenë e dedikuar Pakoja Emergjente”.
