Ka shkuar në 10 mijë e 419 numri i përgjithshëm i të infektuarve me koronavirus në Kosovë.
Që nga marsi kur janë regjistruar rastet e para me koronavirus e deri më sot, në Kosovë numërohen 10 mijë e 419 persona të infektuar me COVID-19.
Sipas Institutit Kombëtar të Shëndetësisë Publike të Kosovës (IKSHPK), në 24 orët e fundit në vend janë regjistruar edhe 172 raste të reja me koronavirus.
Sipas të dhënave të IKSHPK-së, brenda ditës kanë ndërruar jetë 14 persona dhe deri më tani në vendin tonë kanë ndërruar jetë 341 persona të cilët ishin të prekur me koronavirus, por që vuanin edhe nga sëmundje të tjera.
Po ashtu, IKSHPK-ja ka njoftuar se gjatë 24 orëve të fundit janë shëruar edhe 114 persona nga koronavirusi dhe numri i përgjithshëm i personave të shëruar është 6 mijë e 58.
Bazuar në këto të dhëna të IKSHPK-së, aktualisht në tërë Kosovën janë 4 mijë e 20 raste aktive me koronavirus.
Sa i përket gjendjes nëpër komuna, Prishtina prin me numrin më të madh të rasteve dhe se vetëm brenda 24 orëve të fundit janë regjistruar edhe 78 raste të reja.
