Moda shpesh na shtyn të zgjedhim rroba që theksojnë linjat e trupit, por shumë njerëz nuk e kuptojnë se veshjet e ngushta mund të ndikojnë negativisht në shëndetin tonë.
Nga qarkullimi i gjakut te tretja e deri tek frymëmarrja, trupit i duhet të “luftojë” për t’u përshtatur me veshje që nuk e lejojnë të lëvizë lirshëm.
Mjekët paralajmërojnë se stili i ngushtë, kur bëhet zakon i përditshëm, mund të shkaktojë probleme serioze që shpesh i neglizhojmë.
1. Ndikon në qarkullimin e gjakut
Kur pantallonat, xhinset apo streçet janë shumë të ngushta, ato shtypin enët e gjakut, veçanërisht në këmbë dhe ijë.
Kjo pengon qarkullimin normal dhe mund të çojë në:
ndjesi mpirjeje ose djegieje,
fryrje të këmbëve,
madje edhe venat me variçe me kalimin e kohës.
Gratë që mbajnë shpesh streçe të ngushta ose xhinse të forta rrezikojnë më shumë për shkak të kompresimit të vazhdueshëm në zonën e legenit.
2. Kufizon frymëmarrjen dhe lëvizjen
Këmishat, korsetë apo reçipetat shumë të ngushta vështirësojnë frymëmarrjen e thellë dhe mund të shkaktojnë presion në diafragmë.
Në afat të gjatë, kjo mund të sjellë:
lodhje të shpejtë,
marramendje,
dhimbje në shpinë dhe gjoks,
dhe qëndrim të keq trupor (posturë të shtrembër).
Trupi ka nevojë të zgjerohet dhe të marrë frymë lirshëm, jo të mbahet “nën kontroll” gjithë ditën.
Veshjet e ngushta rreth belit, si rripat e fortë apo pantallonat me bel të lartë, shtypin stomakun dhe zorrët.
Kjo mund të shkaktojë:
urth (aciditet që ngjitet në fyt),
fryrje barku,
ndjesi të rëndë pas ngrënies,
madje edhe refluks gastrik kronik te personat me ndjeshmëri.
Mjekët gastroenterologë theksojnë se barku duhet të ketë hapësirë, sidomos pas vakteve — përndryshe, sistemi tretës vuan.
4. Rrit rrezikun për infeksione të lëkurës dhe organeve gjenitale
Kur veshjet janë shumë të ngushta dhe sintetike, ato mbajnë lagështi dhe nxehtësi.
Kjo krijon një mjedis ideal për zhvillimin e baktereve dhe kërpudhave, sidomos në zonat intime.
Te gratë, kjo rrit rrezikun për:
irritime të lëkurës,
puçrra apo folikulit (inflamacion i rrënjëve të qimeve).
Një nga mënyrat më të thjeshta për ta shmangur këtë është të zgjedhësh veshje pambuku që lejojnë frymëmarrje të lëkurës.
5. Dëmton muskujt dhe nervat
Presioni i vazhdueshëm i veshjeve të ngushta mund të shtypë nervat periferikë, sidomos në kofshë dhe ijë.
Ky fenomen njihet si “sindroma e xhinseve të ngushta” (tight pants syndrome) dhe mund të shkaktojë:
mpirje,
ndjesi shpimi gjilpërash,
dhimbje në pjesën e poshtme të trupit.
Në raste ekstreme, nervat mund të dëmtohen përkohësisht, duke sjellë vështirësi në ecje ose lëvizje.
Si të vishesh shëndetshëm (pa sakrifikuar stilin)
-Zgjidh veshje me materiale natyrale si pambuk, lino ose viskozë.
-Merri veshjet një numër më të madh nëse ndihesh i/e shtrënguar gjatë uljes apo ngritjes.
-Alterno ditët me veshje të lirshme dhe të rehatshme.
-Mos e mbaj të njëjtën palë xhinse apo streçe për orë të gjata çdo ditë.
-Dëgjo trupin tënd, nëse ndjen mpirje, fryrje ose skuqje, është shenjë që trupi po të paralajmëron.
