Arktiku ka kaluar vitin më të nxehtë të regjistruar ndonjëherë, sipas një raporti të publikua sot nga Agjencia Amerikane për Vëzhgimin Oqeanik dhe Atmosferik (NOAA), i cili paraqet një tablo alarmante për këtë rajon veçanërisht të ekspozuar ndaj pasojave të ngrohjes globale.
”Mes tetorit 2024 dhe shtatorit 2025, temperaturat ishin 1.6 gradë Celsius mbi mesataren e periudhës 1991–2020”, sipas raportit vjetor për Arktikun, i cili mbështetet në të dhëna që datojnë që nga viti 1900.
Tom Ballinger, bashkautor i studimit dhe studiues në Universitetin e Alaskës tha se ishte alarmante të shihej një ngrohje e tillë në një periudhë kaq të shkurtër, duke e cilësuar këtë prirje të paprecedent ndoshta edhe për mijëra vjet.
Viti i analizuar nga NOAA përfshin vjeshtën më të ngrohtë, dimrin e dytë më të ngrohtë dhe verën e tretë më të ngrohtë në Arktik që nga viti 1900.
Ky rajon, i cili përfshin Polin e Veriut, ndikohet nga një fenomen i quajtur ”amplifikim arktik”, që bën që ai të ngrohet më shpejt se gjerësitë gjeografike mesatare.
Ky mekanizëm lidhet me disa faktorë, përfshirë humbjen e dëborës dhe të akullit.
