Juan Orlando Hernández, ish-presidenti i Hondurasit, është liruar nga burgu, sipas të dhënave online të të burgosurve federalë, pas faljes nga presidenti i SHBA-ve Donald Trump për akuzat e drogës.
Siç shkruan BBC, Hernández u lirua të hënën e 1 dhjetorit nga objekti i sigurisë së lartë në Virginia-n Perëndimore.
Hernández u shpall fajtor në mars të vitit 2024 për komplot për të importuar kokainë në SHBA dhe për posedim të armëve automatike. Ai u dënua me 45 vite burg.
Presidenti amerikan tha se Hernandez ishte “trajtuar shumë ashpër dhe padrejtësisht” në një postim në rrjetet sociale ku njoftoi vendimin të premten.
Këtë të martë, bashkëshortja e Hernández-it, Ana García de Hernández, falënderoi Trump-in për faljen dhe tha se burri i saj tani është një njeri i lirë.
Hernández, anëtar i Partisë Kombëtare të Hondurasit që shërbeu si president i vendit nga viti 2014 deri në vitin 2022, u ekstradua në SHBA në prill të vitit 2022 për t’u gjykuar për drejtimin e një konspiracioni të dhunshëm të trafikut të drogës dhe ndihmën për kontrabandimin e qindra tonëve kokainë në SHBA.
Gjatë gjyqit, prokurorët në New York thanë se Hernández e drejtonte vendin e Amerikës Qendrore si një “narko-shtet” dhe pranoi miliona dollarë ryshfet nga trafikantët e drogës për t’i mbrojtur ata nga ligji.
Ai u urdhërua gjithashtu të paguante një gjobë prej 8 milionë dollarësh si pjesë e dënimit. Trump shpjegoi arsyetimin e tij për faljen duke folur me gazetarët në Air Force One të dielën. Po ashtu pretendoi se hetimi ndaj Hernández ishte një “kurth i administratës Biden“, duke iu referuar paraardhësit të tij në Shtëpinë e Bardhë.
“Ata në thelb thanë se ai ishte një trafikant droge sepse ishte president i vendit,” tha Trump.
Lirimi i Hernández-it vjen ndërsa Hondurasi është i bllokuar në një “barazim teknik” për zgjedhjen e presidentit të ri.
