Ish deputeti i AAK-së, Pal Lekaj, në një prononcim për GazetaBlic ka folur për gjendjen politike në vend, duke thënë se Kosova nuk mund të vazhdojë të funksionojë me institucione të paralizuara dhe me paaftësinë e partive për të formuar qeverinë.
Sipas tij, situata aktuale e ka bërë të qartë se vendi ka nevojë për legjitimitet të ri politik.
Lekaj thotë së qytetarët janë të lodhur nga krizat dhe dështimet, ndaj beson se zgjedhjet e reja do të prodhojnë rezultat dhe do rikthejnë stabilitetin politik.
“Unë besoj se zgjedhjet do të prodhojnë rezultat sepse qytetarët janë lodhur nga dështimet, nga krizat e panevojshme dhe nga mungesa e papergjegjësisë. Ka një reflektim të qartë shoqëror dhe politik se kjo qeverisje ka humbur besimin”, deklaroi ai.
Megjithatë, ai pranon se ekziston rreziku që vendi të përballet sërish me të njëjtat probleme, sidomos nëse vazhdohet me qasjen aktuale qeverisëse, të cilën ai e quan të mbështetur në propagandë.
“Rreziku ekziston gjithmonë kur ke pushtet që merret me propagandë e jo me punë. Por besoj se qytetarët këtë herë do të jenë më të vendosur dhe me të qartë në botën e tyre dhe se vendi do të dalë nga ky ngërç me një qeveri më të përgjegjshme dhe më stabile”, tha ai.
Në fund, Lekaj thotë se vendi ka nevojë për seriozitet dhe përgjegjësi, duke theksuar se gjithcka nis me mbajtjen e zgjedhjeve të reja, shkruan Gazeta Blic.
“Kosova ka nevojë për seriozitet, jo eksperimente. Dhe kjo nis me zgjedhje të reja”.
