Shkruan : Blerim Valla
Organizuar nga Qendra Kombëtare e Poetëve, Shkrimtarëve dhe Artistëve “Gjakova”, në Pallatin e Kulturës “Asim Vokshi” në Gjakovë u mbajt Festivali Mbarëkombëtar i Poezisë, edicioni i pestë i tij, i përkrahur nga DKRS e Gjakovës, e ku lexuan numër rekord krijuesish të poezisë (72 veta)!
Në këtë ngjarje poetike morrën pjesë shumë poetë e poetesha nga të gjitha trevat shqiptare si dhe nga diaspora, poezitë e të cilëve ishin përzgjedhur në bazë të konkursit të shpallur kohë më parë nga Q K P SH A “Gjakova”.
Juria e “Festivalit Mbarëkombëtar të Poezisë 2025”, pasi dëgjoi poezitë e lexuara nga autorë – et e tyre vlerësoi dhe përzgjodhi poezitë më të mira. Duke ndarë dy çmime për vendin e tretë, dy çmime për vendin e dytë dhe një çmim për vendin e parë!
Në krye të këtij organizimi të këtij festivali është shkrimtarja e aktivistja e njohur Mevlyde Mezini -Saraçi e cila edhe e pati fjalën hyrëse duke përshëndetur pjesëmarrësit dhe ata që mundësuan mbajtjen e këtij festivali. Më pas festivali vazhdoi me paraqitjet poetike të konkurrentë – eve.
Në fund juria e festivalit zgjodhi poezitë më të mira sipas bindjes së tyre. Vendi i parë : Jetlira Avdiaj me poezinë “Pezull”. Vendi i dytë: Agim L Bajrami – “Kafe e lënë në mes” dhe Minivere Muja Maka – “Penelopa nuk fle”. Dhe vendi i tretë: Nurie Maliqi Baduni – “Në Qafë Botë ndahen Botët”, e Xhemkadri Kastrati – “Më qaj nëse vdes”. Ndërsa Çmimi i Publikut i takoi Fjolla Muhaxhiri – Agusholli me poezinë “Poezia që nuk nuk u shkrua kurrë”.
Në përmbyllje, organizatorja Mevlyde Mezini – Saraçi për të gjithë konkurrentë – et ndau nga një kopje të Antologjisë Poetike me titull “Poezia nuk njeh kufij” e ku gjenden të gjitha poezitë që u lexuan në këtë edicion të pestë /InLajmi/
