Selena Gomez dhe Benny Blanco janë zyrtarisht të martuar! Çifti ndau për herë të parë fotot nga dita e tyre e veçantë në Instagram, duke e ndarë lajmin e bukur me miliona ndjekës në mbarë botën.
Dasma u mbajt më 27 shtator në një ceremoni private dhe romantike në Santa Barbara, ku ishin të pranishëm disa nga emrat më të njohur të Hollywood-it, përfshirë Taylor Swift, Steve Martin dhe Martin Short. Ceremonia u zhvillua në një rezidencë private, ndërsa festa u organizua në hotelin luksoz El Encanto.
Selena mahniti me një fustan nusërie elegant me shpinë të hapur, dizajnuar nga Ralph Lauren. Edhe Benny zgjodhi një kostum të personalizuar nga i njëjti stilist. Në një nga fotot më të ndjera që ndanë në rrjete sociale, Benny shihet i mbështetur në gjurin e Selenës, duke e shikuar me dashuri, ndërsa në një tjetër ata duken të kapur për dore.
Historia e tyre e dashurisë u bë publike në vitin 2023, dhe një vit më vonë, në dhjetor të 2024-ës, çifti u fejua. Këtë vit ata publikuan edhe albumin e tyre të përbashkët me titull “I Said I Love You First”, i cili përmban 14 këngë. Pak përpara publikimit, Spotify publikoi një intervistë të përbashkët ku ata folën për procesin krijues dhe bashkëpunimin mes tyre.
Në deklaratat e saj të fundit, Selena u shpreh se “nuk ishte ndjerë kurrë kaq e sigurt për asgjë tjetër në jetën e saj”. Ndërsa Benny tha se që në momentin e parë kur filluan të kalonin kohë bashkë, e kuptoi se ajo ishte gruaja me të cilën donte të martohej.
