Aktorja e famshme italiane me origjinë tuniziane, Claudia Cardinale, e njohur për rolet e saj të paharrueshme në filma si Leopardi dhe Pantera Rozë, është ndarë nga jeta në moshën 87-vjeçare. Lajmin e konfirmoi agjenti i saj, Laurent Savry, i cili tha se ajo u shua në Nemours të Francës, pranë fëmijëve të saj.
“Na lë trashëgiminë e një gruaje të lirë dhe të frymëzuar, si artiste dhe si njeri,” u shpreh Savry për agjencinë AFP.
Nga Tunizia drejt Hollivudit
Claudia Cardinale, ylli italian i kinemasë, ndahet nga jeta në
E lindur në prill të vitit 1938 në Tunizi, nga prindër sicilianë, Cardinale fitoi famë që në adoleshencë kur u shpall “gruaja italiane më e bukur në Tuniz” në një konkurs bukurie. Çmimi ishte një udhëtim në Festivalin e Filmit në Venecia, ku producentët e vërejtën dhe e ftuan të hynte në botën e kinemasë.
Fillimisht ajo hezitonte, pasi ëndërronte të bëhej mësuese. Por, siç kujtonte më vonë, vendosi të “provonte këtë punën e kinemasë” me nxitjen e babait.
Jeta personale dhe trashëgimia
Claudia Cardinale, ylli italian i kinemasë, ndahet nga jeta në
Pas ndarjes nga producenti Franco Cristaldi në fillim të viteve ’70, ajo krijoi një lidhje të gjatë me regjisorin napolitan Pasquale Squitieri, me të cilin pati një vajzë, që gjithashtu mban emrin Claudia.
Cardinale vazhdoi të performonte edhe në moshë të thyer, duke u shfaqur në serialin zviceran Bulle në vitin 2020.
Përveç karrierës artistike, ajo ishte e angazhuar në mbrojtjen e të drejtave të grave dhe në vitin 2000 u shpall Ambasadore e Vullnetit të Mirë e UNESCO-s. Në 2002 ajo mori çmimin për arritje jetësore në Festivalin e Filmit në Berlin.
“Kam jetuar mbi 150 jetë: prostitutë, shenjtore, romantike, çdo lloj gruaje. Dhe kjo është e mrekullueshme, të kesh mundësinë të ndryshosh gjithmonë,” shprehej ajo me krenari.
Ministri i Kulturës në Itali, Alessandro Giuli, e cilësoi Cardinale “një nga aktoret më të mëdha italiane të të gjitha kohërave”, duke theksuar se ajo mishëronte “hijeshinë italiane”.
