Trëndafili ka qenë simbol i dashurisë, pasionit dhe feminitetit që nga lashtësia. Kjo lule madhështore kërkon kujdes të veçantë për t’i dhuruar kopshtit hijeshinë dhe aromën e saj të papërsëritshme
Trëndafili, me bukurinë e tij të pasur dhe aromën elegante, ka mahnitur breza të tërë dhe me të drejtë quhet “mbretëresha e luleve”. Çdo kopsht ku lulëzojnë trëndafilat merr një hijeshi të veçantë. Megjithatë, edhe pse duken të fortë dhe të qëndrueshëm, trëndafilat janë delikatë dhe të ndjeshëm, ndaj kërkojnë kujdes të vazhdueshëm për të lulëzuar plot shkëlqim.
Një nga shenjat më të zakonshme se trëndafili juaj po vuan është nxirja ose verdhëzimi i gjetheve. Kjo mund të ndodhë për shkak të mungesës së lëndëve ushqyese, ujitjes së tepërt, dëmtimit nga insektet apo për shkak të sëmundjeve. Lajmi i mirë është se problemet mund të zbulohen me kohë dhe të trajtohen, në mënyrë që trëndafilat të rikthehen të shëndetshëm dhe të hijshëm. Ja çfarë duhet të dini për t’u dhuruar atyre jetëgjatësi dhe lulëzim gjatë gjithë sezonit,
Dëmtuesit
Kur trëndafilat sulmohen nga morra e gjelbër ose merimangat e kuqe, ata thithin lëndët ushqyese nga gjethet, duke i bërë ato të verdha dhe të vyshkura.
Çfarë ndihmon:
- Përzieni 150–300 g sapun kaliumi me 10 litra ujë dhe spërkatni bimën – kjo është një mënyrë natyrale për të larguar dëmtuesit.
- Një zgjidhje edhe më natyrale është preparati i hithrës: dy grushte gjethe të grira hithre lihen në 2 litra ujë për 24 orë, më pas me lëngun spërkaten trëndafilat.
Mungesa e lëndëve ushqyese
Trëndafilat kanë nevojë për një përzierje të mirë elementësh ushqyes – azot, kalium, hekur, magnez dhe fosfor. Nëse ndonjëri prej tyre mungon, gjethet japin shenja të qarta:
- Mungesa e kaliumit: njolla verdhë-kafe.
- Mungesa e azotit: gjethe që verdhohen në mënyrë të njëtrajtshme.
- Mungesa e hekurit: maja e gjetheve verdhë, por skajet mbeten jeshile.
- Mungesa e magnezit: venat e gjethes verdhohen.
- Mungesa e fosforit: gjethe të zbehta dhe rritje e dobët.
Çfarë të bëni: përdorni plehra të posaçme për trëndafilat nga qendrat e kopshtarisë për t’i kthyer ekuilibrin bimës. Kujdes – para se të ushqeni bimën, kontrolloni nëse shkaku nuk janë dëmtuesit, sepse ushqyerja e gabuar mund t’i bëjë më shumë dëm se dobi.
Sëmundjet e trëndafilit
Nëse mbi gjethet e verdha shfaqen edhe njolla të errëta, shkaku mund të jetë një sëmundje kërpudhore, myku ose pikat e zeza. Këto sëmundje e dobësojnë bimën dhe e bëjnë gjithnjë e më të zbehtë.
Mos e teproni me plehra të pasura me azot, pasi kjo i bën trëndafilat më të ndjeshëm ndaj sëmundjeve. Një zgjidhje shumë më e mirë është plehërimi me kalium, i cili forcon qelizat dhe i bën bimët më rezistente.
Ujitja e tepërt
Trëndafilat duan lagështi, por nuk e durojnë ujitjen e tepërt. Kur toka është gjithmonë e lagur, rrënjët nuk marrin mjaftueshëm oksigjen, dhe si pasojë, bima stresohen dhe gjethet verdhohen, transmeton Telegrafi.
Këshillë: ujisni vetëm kur shtresa e sipërme e tokës është tharë. Toka duhet të jetë gjithmonë e lirshme dhe e drenazhuar mirë.
