Fotografitë e dorës së djathtë të presidentit amerikan, Donald Trump, në të cilat shihet një mavijosje, kanë nxitur sërish spekulime mbi gjendjen shëndetësore.
Të hënën, gjatë një takimi në Zyrën Ovale me presidentin e Koresë së Jugut, Lee Jae Myung, ishte e dukshme mavijosja në dorën e djathtë të 79-vjeçarit.
Po atë ditë, ndërsa ishte ulur pranë tryezës “Resolute Desk”, Trump mbuloi mavijosjen duke vendosur dorën e majtë mbi të djathtën – pikërisht në vendin ku më herët ishte vërejtur mavijosja.
Gjithashtu, fotografi të zmadhuara të Trumpit gjatë paraqitjes në Zyrën Ovale më 22 gusht tregojnë pjesën e sipërme të dorës së djathtë, ku vërehet përdorimi i grimit.
Më 17 korrik, Shtëpia e Bardhë njoftoi se liderit republikan i ishte diagnostikuar kohët e fundit insuficienca kronike venoze, një gjendje e zakonshme e venave.
Zëdhënësja e Shtëpisë së Bardhë, Karoline Leavitt, tha në një konferencë për shtyp në korrik se diagnoza u vendos pas testeve mjekësore që shqyrtuan ënjtjen e këmbës dhe mavijosjet në pjesën e sipërme të dorës së djathtë.
Mjeku i Shtëpisë së Bardhë, Sean Barbabella, e përshkroi insuficiencën kronike venoze si një gjendje “beninje dhe të zakonshme” në një memorandum mbi shëndetin e presidentit.
Në raportin e muajit korrik, Barbabella tha se imazhet e fundit që tregojnë mavijosje në dorën e Trumpit “janë në përputhje me një irritim të lehtë të indeve të buta nga shtrëngimi i shpeshtë i duarve” dhe nga përdorimi i aspirinës si pjesë e një regjimi standard për parandalimin e sëmundjeve kardiovaskulare.
Për mavijosjet dhe grimën në dorë, edhe Leavitt fundjavën e kaluar “fajësoi” shtrëngimin e shpeshtë të duarve.
E pyetur për shtresën e grimit mbi mavijosjen, Leavitt deklaroi se Trump shtrëngon duart më shumë se çdo president tjetër.
“Presidenti Trump është një njeri i popullit, ai takon çdo ditë më shumë amerikanë dhe u shtrëngon duart më shumë se çdo president më parë. Përkushtimi i tij është i padiskutueshëm dhe ai e dëshmon këtë çdo ditë,” tha ajo.
