Nënkryetarja e Kuvendit dhe njëherit ministrja në detyrë e Drejtësisë, Albulena Haxhiu, ka reaguar lidhur me procesin e konstituimit të Kuvendit të Kosovës dhe zgjedhjen e nënkryetarëve nga komunitetet joshumicë.
Ajo akuzoi opozitën se nuk pati vullnetin dhe guximin e nevojshëm për ta votuar Nenad Rashiqin në pozitën e nënkryetarit të Kuvendit.
“Sot kishte mundësi që dita të përmbyllej me dy lajme të mira: konstituimi i Kuvendit dhe largimi i përfaqësuesit të Listës Serbe nga Kryesia e Kuvendit. Por fatkeqësisht, opozita nuk pati as vullnetin dhe as guximin e nevojshëm”, tha Haxhiu.
Sipas saj, për vetëm gjashtë vota më shumë, Rashiq do të ishte zgjedhur nënkryetar i Kuvendit.
“Shpresoj që deri të enjten të ketë reflektim opozitar”, shtoi ajo.
Në reagimin e saj në Facebook, Haxhiu tha gjithashtu se kryeterroristi Milan Radoiçiq është kryetar formal i Listës Serbe dhe theksoi se qytetarët e Kosovës, si dhe partitë politike, duhet të bashkohen për të mbrojtur interesin e vendit, duke përmendur edhe respektin për heronjtë Enver Zymberi e Afrim Bunjaku.
