Blake Lively është gati të kthehet fuqishëm me një projekt të ri filmik, këtë herë në një komedi romantike me elementë aksioni të titulluar The Survival List. Filmi, tashmë në “duart” e Lionsgate, do ta ketë aktoren jo vetëm në rolin kryesor, por edhe në rolin e bashkëproducentes.
Narrativa e filmit ndjek Annie-n, një producente e një reality show, e cila detyrohet të punojë me Chopper Lane, një “ekspert mbijetese” i vetëshpallur. Por kur të dy përfundojnë në një ishull të izoluar, Annie zbulon se Chopper është një mashtrues pa asnjë aftësi reale për mbijetesë. E mbetur pa zgjidhje tjetër, ajo merr situatën në dorë për të mbijetuar, ndërkohë që mes tyre fillon të lindë një kimi e papritur.
The Survival List shënon rikthimin e parë të Lively-t në kinematografi pas betejës së saj ligjore me regjisorin Justin Baldoni, kolegun e saj në filmin It Ends With Us. Në dhjetor 2024, aktorja paditi Baldoni-n për ngacmim seksual, ndërsa ky i fundit reagoi me një kundërpadi prej 400 milionë dollarësh për shpifje. Padia u rrëzua në qershor 2025, por çështja pritet të shkojë në gjyq në mars të vitit 2026.
Roli më i fundit i Lively-t ishte në filmin Another Simple Favor, vazhdimi i suksesit A Simple Favor, që u shfaq premierë në festivalin SXSW në mars dhe u publikua në Prime Video në maj 2025.
Me The Survival List, aktorja duket e vendosur të kthejë faqen dhe të rikthehet me energji të re në një zhanër që mikson aventurën, humorin dhe romancën, një formulë që i ka sjellë sukses edhe më parë.
Lionsgate e ka marrë tashmë në zotërim projektin, ndërsa detaje për regjisorin dhe kastin priten të zbulohen së shpejti.
