Presidenti i Lille, Olivier Letang, konfirmoi bisedimet me Juventusin për Edon Zhegrovën, por këmbënguli se “dera ishte pak më e hapur atëherë se sa është sot”.
Në ditët e fundit ka pasur disa raporte që klubet po afroheshin drejt një marrëveshjeje, edhe pse çmimi i kërkuar ishte 25 milionë euro.
Kjo konsiderohej e tepruar për një lojtar që, në fund të fundit, ka kontratë që skadon në qershor 2026, pa asnjë shenjë për rinovim në horizont.
Në një konferencë për shtyp sot, presidenti i LOSC, Letang, e paraqiti situatën nga këndvështrimi i tij.
“Ai u stërvit me ne, është këtu dhe në dispozicion të trajnerit,” tha Letang.
“Kjo për faktin se ka shumë gjasa të qëndrojë me ne këtë sezon. E njoh shumë mirë (drejtorin e Juventusit) Damien Comolli, kemi folur disa herë që prej se mori drejtimin te Juventusi. Është e vërtetë që patëm disa diskutime para disa javësh. Dera ndoshta ishte pak më e hapur atëherë se sa është sot. Qëndrimi im është që Edoni do të qëndrojë me ne këtë sezon. Përveç kësaj, për momentin nuk kemi marrë asnjë ofertë. Mediat italiane priren të ekzagjerojnë. Nuk ka asnjë marrëveshje dhe asnjë diskutim për largimin e Edonit drejt Italisë.”
Mediat italiane kanë raportuar se Zhegrova ka rënë dakord për kushtet personale me Juventusin dhe do t’i japë atyre përparësi për hapin e radhës në karrierën e tij.
Ylli kosovar është 26-vjeçar dhe do të ishte zëvendësimi në Torino për Nico Gonzalez, kështu që fillimisht duhet të shitet argjentinasi, transmeton GazetaExpress.
Ai mungoi në ndeshjen hapëse të sezonit për shkak të një problemi muskulor, por është i gatshëm për këtë fundjavë.
