Kuvendi i Kosovës nesër do të mbajë seancën konstituive në ora 11:00, raporton Gazeta Blic.
Nga Vetëvendosje nuk janë deklaruar nëse Albulena Haxhiu do të jetë sërish e propozuar për kryeparlamentare, megjithëse më herët patën deklaruar se ajo do të jetë kandidate.
Ndërsa, nga LDK e AAK kanë deklaruar për Gazeta Blic se nuk kanë ndryshuar qëndrim në lidhje me votën e tyre.
Qëndrim nuk ka ndryshuar as PDK.
Këtë e konfirmoi për Gazeta Blic deputetja e kësaj partie, Ariana Musliu-Shoshi.
“Aktvendimi i Gjykatës Kushtetuese është një rikujtesë e fuqishme se shteti ndërtohet mbi themelet e ligjit dhe Kushtetutës. Në seancën e nesërme presim nga Lëvizja Vetëvendosje të përsërisë të njëjtin epilog me të njëjtin kandidat për kryetar të Kuvendit. Qëndrimi i PDK-së mbetet i pandryshuar, sepse për ne parimi është më i rëndësishëm se kalkulimi politik”, thotë ajo.
Por, deputetja thekson se shkelja e Kushtetutës nuk është thjesht një gabim procedural, por një plagë mbi rendin demokratik.
“Megjithatë, duhet të themi qartë: shkelja e Kushtetutës nuk është thjesht një gabim procedural, por një plagë mbi rendin demokratik. Ata që e cenojnë themelin juridik të shtetit nuk mund të kalojnë pa përgjegjësi. Ndëshkimi i merituar nuk është hakmarrje, por kusht që republika të mbijetojë si shtet serioz, i respektuar dhe i besueshëm”, potencon Musliu-Shoshi.
Ajo ka shtuar se PDK kurrë s’do të jetë pjesë e një loje ku pushteti vihet mbi Kushtetutën.
“Shtetet nuk bien nga jashtë, por rrënohen nga brenda kur institucionet përdhosen, kur ligji anashkalohet dhe kur pushteti vihet mbi Kushtetutën. Ne nuk do të jemi kurrë pjesë e një loje të tillë. Demokracia është përgjegjësi, jo teatër; është rregull, jo kaos; është moral politik, jo vetëm numra në sallë”, vlerëson deputetja.
Krejt në fund, ajo ka shtuar se PDK nuk lëkundet në mbrojtjen e Kushtetutës.
“Prandaj, qëndrimi ynë është i qartë: PDK nuk lëkundet në mbrojtjen e Kushtetutës, dhe kushdo që e shkel atë duhet të përballet me drejtësinë. Ky është borxhi ynë ndaj qytetarëve dhe ndaj vetë shtetit të Kosovës”, deklaroi deputetja e PDK-së, Ariana Musliu-Shoshi.
