PDK në Prizren ka rritur numrin e grave në listën zgjedhore, duke përfshirë profesioniste të reja që sjellin energji dhe përvojë në politikë. Ndër to është edhe Jona Hoxhaj, e cila megjithëse e re në moshë, ka një angazhim të gjatë politik pas vetes. Si pjesë e kabinetit të kryetarit Shaqir Totaj, ajo tashmë garon për herë të parë në zgjedhjet lokale, me numrin 27 në listën e PDK-së.
Jona Hoxhaj iu bashkua PDK-së në vitin 2019, si një prurje e re e mirëpritur nga kryetari i atëhershëm Kadri Veseli. Në vitin 2021 ajo u bë pjesë e ekipit të kryetarit Shaqir Totaj dhe më pas kryetari e emëroi Zëdhënëse të Degës së PDK-së në Prizren. Gjatë zgjedhjeve të vitit 2021 ishte pjesë e ekipit të ngushtë të fushatës së Totajt, ku u dallua për energjinë, kreativitetin dhe profesionalizmin e saj.
Pas fitores, kryetari Totaj e emëroi Zëdhënëse dhe Zyrtare për Marrëdhënie me Jashtë në kabinetin e tij. Për katër vite me radhë, Jona Hoxhaj ka qenë e angazhuar në menaxhimin e projekteve me organizatat joqeveritare, sigurimin e fondeve nga donatorët dhe organizata të huaja, në ndërtimin e partneriteteve me ambasada dhe organizata ndërkombëtare, si dhe në fuqizimin e urave të bashkëpunimit me institucione brenda vendit, në rajon dhe më gjerë.
Gjithashtu, Jona ka luajtur rol të rëndësishëm në organizimin e aktiviteteve dhe eventeve protokolare, duke sjellë profesionalizëm dhe risi në paraqitjet publike të qeverisjes lokale në Prizren.
Me përvojën dhe vizionin e saj, Jona Hoxhaj shihet si një prej zërave më premtues të gjeneratës së re të PDK-së, si një zë i fuqishëm në trajtimin e çështjeve që lidhen me fuqizimin e pozitës së gruas në shoqëri.
